নীতিলতাঙ্কুৰ ৷৷ পুৰণি দিনৰ গ্ৰন্থ পৰিচয়

*

 ‘নীতিলতাঙ্কুৰ’ গ্ৰন্থখন প্ৰথমবাৰৰ বাবে প্ৰকাশ হয় ১৯৪১ চনত৷ সম্পাদক- শৰৎচন্দ্ৰ গোস্বামী আৰু সহকাৰী সম্পাদক শ্ৰীজয়কৃষ্ণ মিশ্ৰ৷  প্ৰকাশক- Govt. of Assam in the Department of Historical and Antiquarian Studies.

শৰৎচন্দ্ৰ গোস্বামী আছিল সেই সময়ৰ যোৰহাট জিলাৰ মানুহ৷ তেওঁ সেই সময়ত অসমৰ বিদ্যালয়সমূহৰ পৰিদৰ্শক আছিল৷ অন্যহাতে পণ্ডিত জয়কৃষ্ণ মিশ্ৰ আছিল কটন কলেজৰ সংস্কৃত বিভাগৰ অধ্যাপক৷ 

গ্ৰন্থখনৰ প্ৰকাশৰ মূল্য আছিল এটকা ৷

গ্ৰন্থখনৰ মুদ্ৰণঃ মতীন্দ্ৰ নাথ সিংহ, লক্ষ্মীবিলাস  প্ৰেছ লিমিটেড, জগন্নাথ দত্ত পথ, কলকাতা

গ্ৰন্থখনত সৰ্বমুঠ আঠটা অধ্যায় আছে৷   মুঠ পৃষ্ঠা সংখ্যা ৪০৷ গ্ৰন্থখনৰ আগকথা লিখা হৈছে ১৯৪১ চনৰ ২৫ মাৰ্চ তাৰিখে৷

নীতিলতাঙ্কুৰৰ  মূল হাতেলিখা পাণ্ডুলিপি বা হস্তলিপিটোত প্ৰাচীন ৰজাদিনীয়া অসমৰ বহুতো ঐতিহাসিক সমল লিপিবদ্ধ হৈ আছে৷ এই পাণ্ডুলিপিটো পোৱা হৈছিল নগাঁও জিলাৰ হাতীচুং মৌজাৰ গজপুৰীয়া গাঁৱত নিত্যানন্দ শৰ্মাৰ ঘৰত ৷ এই পাণ্ডুলিপিটো গছৰ বাকলিত লিখা হৈছিল আৰু মুঠ ২৪ খিলা বাকলি উদ্ধাৰ কৰা হৈছিল৷ বাকলিবোৰৰ বহল ৩ ইন্সি আৰু দীঘল ১২ ইন্সি ৷ 

নীতিলতাঙ্কুৰ গ্ৰন্থখনৰ বিষয়ে শৰৎচন্দ্ৰ গোস্বামীয়ে প্ৰথম জানিছিল নগাঁৱৰ তোষেশ্বৰ শৰ্মাৰপৰা৷ তোষেশ্বৰ শৰ্মা আছিল নগাঁও চৰকাৰী হাইস্কুলৰ শিক্ষক৷ শৰৎচন্দ্ৰ গোস্বামীয়ে এই পাণ্ডুলিপিটোৰ প্ৰতিলিপি কৰি পৰৱৰ্তী সময়ত  নিত্যানন্দ শৰ্মাক পুনৰ ঘূৰায় দিয়ে৷

মনোৰাম  আৰু গোপালদেৱ নামৰ দুজন ব্যক্তি বৈষ্ণৱ ধৰ্মত দিক্ষাগ্ৰহণ কৰি উজনি অসমত থাকিবলৈ লয়৷ তেওঁলোকেই  সেই সময়ত বোকাখাতত এখন সত্ৰ স্থাপন কৰে৷ সত্ৰখনৰ নাম কুৰুৱাবাহী সত্ৰ৷ মনোৰামৰ পুত্ৰ আছিল বিভুৰাম দেৱ৷ বিভুৰাম এজন ভাগৱতী আছিল৷  তেওঁ পৰৱৰ্তী সময়ত সত্ৰত ভাগৱত পাঠ আৰু ব্যাখ্যা কিৰিছিল৷ বিভুৰামৰ পুত্ৰ আছিল ৰঙ্গচৰণ আৰু ৰঙ্গচৰণৰ পুত্ৰ হৈছে পৰশুৰাম বিদ্যাবাগীশ৷ এই পৰশুৰামেই ‘নীতিলতাঙ্কুুৰ’ গ্ৰন্থৰ ৰচক৷  পৰশুৰাম আছিল এজন ভাল গৱেষক৷ তেওঁ কামৰূপত প্ৰথম সংস্কৃত শিক্ষা লাভ কৰে আৰু তাৰ পাছত নৱদ্বীপ এলেকালৈ আহে৷ তাতে তেওঁ বিদ্যাবাগীশ উপাধি লাভ কৰে৷

 শৰৎচন্দ্ৰ গোস্বামীয়ে গ্ৰন্থখনৰ আগকথাত উল্লেখ কৰিছে যে  মূলতঃ সত্যানন্দ দুৱৰা ফুকন নামৰ এজন ব্যক্তিৰ পৃষ্ঠপোষকতাত এই গ্ৰন্থখন প্ৰণয়ন কৰা হৈছে ৷

গ্ৰন্থখনত আহোম ৰাজত্বৰ  ৰাজনৈতিক, সামাজিক, অৰ্থনৈতিক আদি নীতি বিষয়ক বহুত তথ্য মজুত আছে৷ সৈন্য বাহিনীক কেন্দ্ৰ কৰিও বহুতো নীতি বা তেওঁলোকৰ কাৰ্যকলাপৰ বিষয়ে গ্ৰন্থখনত উল্লেখ আছে৷  ৰজাৰ গৃহ নিৰ্মাণ প্ৰণালী সম্পৰ্কেও চিত্ৰসহ গ্ৰন্থখনত উল্লেখ আছে৷ 

©ভাস্কৰ ভূঞা, গৱেষক ছাত্ৰ, গুৱাহাটী বিশ্ববিদ্যালয়, ফোন-৮৭৫১৯৪৩৩৮৭

নীতিলতাঙ্কুৰ গ্ৰন্থখন পঢ়িবলৈ এই লিংকেৰে প্ৰৱেশ কৰক-https://as.wikisource.org/wiki/চিত্ৰ:নীতিলতাঙ্কুৰ.djvu